Dancefloor

Friday, 11th November 2005

Dancefloor

Nasan ka na
Nagsimula na ang kanta
Sa bawat linyang mabigkas
Lumalapit ang wakas

Itinutulak ang sarili paharap
Laban sa agos ng tao't panahon
Para lang makita ka
Kagandahang hawak ng iba

At matatapos ang awit
kasabay ng gabi
kasabay sa pagpatak
ng lungkot at pangungulila

Iabot mo ang iyong kamay
Kahit naiwan na sa panahon
Kahit nahugasan na ng luha
Kahit wala na ang tugtog
Upang tayo'y maging isa
Sa isang sayaw
Isang sandaling wala na

Ngayo'y naghihintay sa kama
Nakatungangang umaasa
Upang masagot ang mga bakit
na bumabagabag sa akin

Pinabayaang pagkakataon
Kung mahabol ko lang sana
Hindi na magpapatangay
Sa bilis ng buhay

At sa bukang liwayway
Maliligo sa liwanag
Malilimot ang gabi
at sa panaginip...

Iabot mo ang iyong kamay
Bayaan mong ika'y matangay
Lumipad sa ulap
Sa langit ng aking ligaya
tayo'y magiging isa
sa isang sayaw
isang sandaling atin